Joh 16 | MHL | STEP | “Aria ni me oro-booneka naep opora fain nia maakem. Ne ni fain amisareka, wiimar wi Yuuda wiamiya lotu arowa nain nia iiraremi sisina-pa nia wuikuan. Ne aakisa epa nan imenariya, ikoka nia ifakimep maikuan, i naap onami Mua Maneka uuwowa eliwa onomimik.

John 16

1 “Aria ni me oro-booneka naep opora fain nia maakem. Ne ni fain amisareka, wiimar wi Yuuda wiamiya lotu arowa nain nia iiraremi sisina-pa nia wuikuan. Ne aakisa epa nan imenariya, ikoka nia ifakimep maikuan, i naap onami Mua Maneka uuwowa eliwa onomimik. 3 Wi Auwa me amisaremik, ne yos pun me efa amisaremik. Naeya sira naap onikuan. 4 Yo fain naep nia maakem, epa nain imenareya sira naap nia oniwkin aakisa fan nia maakem fain kema suuweka. Yo iiriw me nia maakem, moram yena niamiya ikem. Aakisa yo nia piipuekam naep opora fain ariman nia maakiyem.”

Ewar Eliwa uuwowa

5 “Ne aakisa o eena efa sesekeya ekapem nain wiar ikiwiyem. Nain yo opora nia maakem muuta nain ni kema damol maneka ikeman. Naapeya yo kaaneke ikiwiyem nain ni mua kuisow-ko me efa nokariman. 7 Nain yo makena nia maakiyem. Ni nia naep maiyem, yo ikiwowa nain maa eliwa-ke. Moram yo me ikiwinen-na ni nia asipowa nain me niar ekapinon. Nain yo ikiwep yena nia sesekominen. 8 Ikoka os-ke ekapemi miiw mua kema suuwowa wadola nain ariman wiar wuinon. Sira feenap, wi pina-pa ikemik nain, ne wiena kekanowa-pa kakeniw ikaiyen naimik nain ne Mua Maneka mua wia mekawowa me pepek naimik, nain. 9 Wi pina ariman wiar wuinon nain feenap, yo opora makena-ke me efar naimik. Wiena kekanowa-pa kakeniw ikaiyen naimik nain ikoka ariman wiar wuowa nain onoma feenap, yo Auwa wiar ikiwinen, ne ni ikoka me efa urufam-ikowen. 11 Ne Mua Maneka wia mekawowa pun ariman wuinon, moram miiw fain woos mua Mua Maneka-ke iiriw mekawak.

12 Yo nia maakowa nain opora unow akena efar ikua, nain ni aakisa miimap kema-pa wuowa me pepek. 13 Ne ikoka Ewar maken akena nain-ke oromi era makena-pa nia pikiweya opor makena amisarep ookowen. Ona kema-pa opora me imeninon, weetak. Opora eena Auwa wiar miimiya nain kakeniw nia maakinon. Ne maa wiimar imenarowa nain pun nia maakinon. 14 Yo opora pun efar aawep nia maakinon, naap onami yo unuma efa purupinon. 15 Auwa maa unowa nain pun yena efarik. Naapeya maem, ikoka Ewar Eliwa-ke opora efar aawep ni nia maakem-ikainon.”

Kema samora-ke kiremi kemelowa imeninon

16 “Ni lawisiw akena yo me efa urufowen, ne naap ikok nainiw efa urufowen,” naap maek. 17 Naeya ona teeria papako wi-wieniw aakunemik, “Nee, kamenap maemi naap maek, ‘Ni lawisiw akena me efa urufowen ne naap ikok nainiw efa urufowen.’ Ne pun feenap maek, ‘Yo Auwa wiar ikiwinen.’ 18 ‘Lawisiw akena’ naek nain onoma kamenap? I kemena me wiar aawimik.” 19 Naap maemi Yeesus nokaru naep onam-ikaiwkin ona amisarep wia maakek, “Ni yo eena maem nain aakunem-ikaiman-i? 20 Yo makena nia maakiyem, ni ikoka omem-ikaiwkin miiw mua unowa kemelikuan. Makena, ni kema damolalowen, nain kema damola nain-ke ikoka kiremi nainiw kemelowa-ke niar imenarinon. 21 Emeria eena uroma opam-ikaeya sirirowa aawiya naap. Ne uroma wueliwa yakiep muuka muuta nain kemelami sirirowa aawok nain me kema suuwinon. 22 Ne nis pun naap, aakisa ni kema damolalep ikeman. Ikoka yo nainiw nia urufamkun ni manek akena kemelowen. Kemelowa nain niar iirarowa me pepek. 23 Ne iir nain ni maa kuisow-ko me efa nokarowen.

Aria yo makena nia maakiyem, yo unuma-pa Auwa maa-ko nokarowen-na eliw nia apekarinon. 24 Iiriw yo unuma-pa maa-ko me nokareman. Ne ikoka fain nokarowen-na eliw aawep kemelow manekiw ikowen.”

Yeesus miiw sira iiriw nomakek

25 “Yo maa unowa fain maemi arekin opora nia iromam. Ne ikoka yo arekin opora nainiw me oninen, weetak. Epa nain kerereya Auwa maemi opora makena fookap nia maakinen. 26 Iir nain yo unuma-pa Auwa kakeniw nokarowen. Me yos-ke Auwa nia nokarominen. 27 Weetak. Auwa ona ni nia kookaliya. Moram niena yo efa kookaliman, ne pun yo o wiar ekapem nain makena efa naiman. 28 Makena, yo Auwa wiar ikok miiwa orom. Ne aakisa miiwa fain piipuap nainiw Auwa wiar urupinen naep.” Naap maek.

29 Naeya ona teeria-ke maakemik, “Aa, aakisa opora makena fookap yia maaken, arekin opora me yia iroman. 30 Neemi aakisa i kema aawimik, maa muutitik no amisaren. Mua-ko nefa nokarowa nain me maowa ikaiwkin nookikir wiar amisaren. Ne aakisa i nefa amisaremik, no Mua Maneka wiar ekapon.” 31 Ne wia maakek, “Ni aakisa makena efa naiman-i? 32 Aria epa nan ekapiya ne aakisa fan kererek, ni ikoka yo yaisow efa wuap baurarep owowa ononer arowen. Nain yo me yaisow ikainen, weetak, Auwa ona efamiya ikainon. 33 Yo oram me maiyem, ni yena efamiya baliwep kema sonom eliwiw ikeka naep opora nain nia maakem. Makena, ni miiwa feek ikok yoowa aawem-ikowen. Nain ni kekaneka, yo miiw sira unowa nain iiriw nomakem.”